Мовароуннаҳр тарихида миллий уйғониш даврлари XI, XII асрлар, кейинчалик XIV асрда Амир Темур ва темурийлар даврида маънавий-маданий уйғониш даври бўлган. XIV аср иккинчи ярми мўғуллардан ҳокимият Темурга ва темурийларга ўтгандан сўнг ҳаётда ҳақиқий уйғониш даври бошланди.
Эски ўзбек адабий тили шакланди. У Тароз ва Яссадан то Ҳиротгача форс тили билан бир қаторда умумий алоқа ва ижод воситасига айланди. Миллий онг, тафаккур, миллий адабиёт ва санъат, илм-фан ривожида кишиларнинг янги тарихий бирлиги шаклланиши эҳтиёжлари ўз аксини топди. Бу давр мутафаккир алломалари, хусусан ўзбек шеъриятида Дурбек, Саккокий, Атоий, Гадоий, Лутфий, Навоий, Бобур, Машраб, Огаҳий ижоди мумтоз ўзбек адабиёти ривожланди.
Нуритдинова Гулноза
XX аср сўнгги чорагида ўзбек миллий адабиётининг лирик жанри унинг поэтикасида миллий-маънавий уйғониш ғоялари билан суғорилган шеърият пайдо бўлди.
Бадиий тафаккуримизда олтмишинчи йилларда вужудга келган ва натижада адабиётнинг кейинги тараққиёт йўлини белгилаган қизғин кўтарилиш ва уйғониш алоҳида ўзига хос давр сифатида эътиборга лойиқдир. Халқимиз миллий онгининг ўсишига улкан таъсир қилган ўша янгиланишлар ўз навбатида умуммиллий-ижтимоий уйғонишнинг эстетик инъикоси эканлигини асло эсдан чиқармаслик керак. Миллий дард ва кулфатларни иложи борича ифодалашга уринган шеъриятимиз эришган ютуқлар, хусусан, Чўлпон, Ойбек, Ғафур Ғулом, Шайхзода, Миртемир, Зулфия каби забардаст санъаткорларимизнинг ўша вақтдаги ижоди халқимиз дунёқарашининг ёришишига, ватанпарварлик туйғуларининг аниқ миллий мазмун касб этишига катта ҳисса бўлиб қўшилганлиги бу кун кўпчиликка сир эмас.
Адабиётда бундан қирқ эллик йил бурун пайдо бўлган ўша буюк навқирон тўлқиннинг энг истеъдодли вакилларидан бири Абдулла Ориповнинг сеҳрли ва юксак шеърияти ўзининг мўъжизакор қудрати ва шиддаткор жасорати билан минглаб, миллионлаб қалбларни ҳамон ҳайратлантириб келмоқда.
Абдулла Орипов XX аср ўзбек адабиётининг забардаст намояндаларидан биридир. Хусусан, XX аср иккинчи ярмидаги шеъриятни унинг ҳайратомуз ва бетакрор асарларисиз тасаввур этиш амри маҳол. Миллий истиқлол адабиёти тарихидаги иккита асосий ва ўзига хос босқичдан бири жадидлар, айниқса, Фитрат, Чўлпон, Қодирийларнинг адабий ва ватандошлик жасорати билан узвий боғлиқ бўлса, ўтган аср олтмишинчи йилларидан бошланган иккинчи тўлқин Абдулла Орипов ҳамда авлоддошларининг фидойи ижодий фаолияти билан чамбарчас боғланган.
Ўкинма, она юрт, ўкинма, халқим,
Десалар, дилингда зорларинг бордир.
Аслида, қўйнингга сирғалиб кириб
Заҳарлар сочгувчи морларинг бордир.
Ўтган йўлларингга ташласам назар,
Қайрилмас қанотли сорларинг бордир.
Сенга шум ғанимлар қазмасинлар чоҳ,
Ёв келса, атаган дорларинг бордир.
Мен митти ўғлингман, лекин юкингни
Кўтариб ўтгувчи норларинг бордир.
Адабиётшунос олим, Абдулла Орипов шеъриятининг доимий таҳлилчиси, мунаққид Дониёр Бегимқулов шоирнинг ўзбек халқи миллий уйғонишига, ўз қадриятларини тиклашга қўшган улуғвор ҳиссаси ҳақида қуйидаги фикрларни таъкидлаган: Абдулла Орипов миллий уйғониш шоири, халқни руҳан камолотга чорловчи шоир сифатида ўз авлодининг кўзга кўринган вакили бўлиб майдонга чиқди. Шеърий сўзнинг теранлиги ва кўламлилиги, ўтмиш ва ўз даври ҳақидаги ҳақ сўз, умуминсоний муаммолар талқини, яхшилик ва ёмонлик, эзгулик ва ёвузлик каби азалий тушунчалар ҳақидаги безовта, чуқур қамровли ўйлар, замонни, халқнинг тарихий тажрибаси, ўтмиши мушоҳадаси орқали тушунишга, талқин қилишга интилиш, шеърий тасвирда ҳақиқати содиқлик, эҳтиросли теран туйғунинг фикр билан ажойиб тарзда омухта бўлиб келиши, кучли мажозийлик шоир шеъриятини юксак чўққиларга кўтарди.
XX аср 60-йилларнинг ўрталаридан кучли эҳтирос, фикр ва туйғунинг гармоник бирлиги қаламга олинаётган мавзу ва мақсаднинг зўрма-зўракиликдан мутлақо холилиги, лирик қаҳрамон ўй-мушоҳадалари ва фикрлаш йўсини билан унинг бадиий талқини ўртасидаги ажиб табиийлик ва уйғунлик Абдулла Орипов услубининг ўзига хос белгиларига айлана бошлади. Бора-бора бу хусусиятлар шоир концепциясидаги фикрий теранлик билан узвий бирлашган ҳолда асарларидаги ғоя тиниқлиги ва конкретлигини белгиловчи поэтик мукаммаллик даражасига кўтарила борди. “Альбомга”, “Муножотни тинглаб”, “Юзма-юз”, “Маяковскийга”, “Ўйларим”, Авлодларга мактуб”, “Она сайёра” сингари шеърларида замондошларимизнинг мураккаб ва зиддиятли, давр ва Ватан тақдири учун куюнчак, ҳар қандай лоқайдлик, қинғирликларга бешафқат, фаол ва курашчан ҳаракатлар яратилиб, бу уни миллий уйғонишга чорлади.
Миллий уйғонишни шеъриятда талқин этган Абдулла Орипов “Доғистон юлдузи” номли авар шоири Расул Ҳамзатовга бағишланган илмий мақоласида “...қандайдир шоир муайян тузумнинг куйчиси сифатида порлаб туриши мумкин. Лекин, тузум барҳам топгач, ўша юлдуздан ном-нишон қолмайди. Ҳа, мангуликнинг юки ниҳоятда оғир. Унги кафолат бериш фақатгина вақтнинг қўлидан келади”.
Ўтган асрда порлаган ўша юлдузлардан айримларигина бугун ҳам нур сочиб турибди, илло улар ҳеч қачон сўнмаганлар. Жаҳон адабиётига ўтган XX аср туҳфа этган ўлмас сиймолардан бири, шубҳасиз, Доғистон юлдузи Расул Ҳамзатовдир.
Мустай Карим, Қайсин Қулиев, Давид Қуғултинов, Чингиз Айтматов кичик миллатларга мансуб бўлиб, Расул ака гоҳо ҳазил аралаш: “Бизлар “нацмен”лар” (миллий озчилик), деб юрувчи эди.
Бу мутойиба тагида теран мазмун мавжуд бўлиб, ижодкорнинг ҳар бири ўз миллатини астойдил ҳимоя қилиб келардилар. Бу жараёнда Расул Ҳамзатовнинг сиймоси ярқ этиб кўзга ташланиб туради. Чунки у “улуғ совет оиласи”ни рад этмаган ҳолда тинимсиз Доғистон ҳақида ёзар, аварчани эса дунёдаги энг гўзал тил, деб ҳисоблар эди. Шоирнинг юртпарварлик, элпарварлик туйғулари бошқаларга ҳеч малол келмасди.
Расул Ҳамзатов дунёга, Доғистон куйчиси бўлиб танилди. “Менинг Доғистоним” Расул Ҳамзатовнинг шоҳ асари дейиш мумкин.
Бундан шундай хулоса чиқариш мумкинки, Абдулла Ориповнинг “Ўзбекистон” қасидаси, “Ҳаким ва ажал”, “Соҳибқирон” достонининг ўзиёқ уни худди Расул Ҳамзатовдек аварни дунёга танитгандек ўзбекни дунёга танитганлигини қайд этмоқ лозим.
Чунки бу асарлар миллий уйғонишга даъват этувчи асар бўлиб ўзбек поэтикасида абадиятга муҳрланганлигини эътироф этса бўлади.
Унинг миллий уйғонишга даъваткор ғояларини тан олмасдан бўлмайди: “Оламда инсон бўлиб туғилдим, Баъзан оламда йиғлаб бўғилдим”. Бу икки жумлада Абдулла Орипов шеърларининг моҳияти акс этади: одам инсон бўлиб туғилганидан фахрланади. Чунки у бутун оламга ҳоким, бутун борлиққа эга бўлган ягона онгли зот. Бутун борлиқ-еру кўк, тоғу тош, денгизу уммон, замину замон, уники. Буни куйламаслик мумкинми асли!
Шу асосда Абдулла Орипов шеърларига ўз ўрнида “мағрур турган халқ” гавдаланади. Аммо шўролар тузуми, мутлоқ ҳоким мафкура ҳимоячиси ҳисоблайдиган танқидчилар унинг баъзи шеърларига шубҳа билан қарайдилар.
Қайсин Қулиев айтганидек, истеъдодли шоир бошқа бировларни такрорламайди. Истеъдодли шоир устозларини эсда тутган ҳолда, ўзига хос йўл ахтаради.